<2064的香港-廣東話篇>

「香港統計處今日發表最新一份人口普查報告，以普通話為母語的居港人數首次超過粵語，達五百五十萬人，佔全港人口約為55%。另外，超過80%的受訪者表示，每天的日常語言為普通話，廣東話僅為次要。有學者擔心廣東話的地位在香港日漸式微…」

2064年。旺角花園餐廳。六點半新聞。在這變化快於一切的社會裏，花園餐廳是我的一片淨土。這是少數僅存侍應會講廣東話、電視會播廣東話新聞、招牌寫著「花園餐廳」而不是「花园餐厅」的餐廳。真正五十年不變的，是1號餐T-bone 牛扒的大小，和那黑椒汁的味道。

少年時，在花園街打完壁球，一班巴打會聚腳於花園餐廳，談天說地。有段時間，中港融合的話題講到㷫合合(btw，我懷疑現在還有沒有人會寫這三個字)，甚麼自由行，搶資源，蝗蟲，中港矛盾隨之炒起，本土意識抬頭，中港你我，壁壘分明。

我還記得我當時如是說：香港在幾十年後，就會如上海或廣州一樣。這兩個大都會，一開始也是以本地人為主。隨著大量外地人不斷湧入，本土亦少不免有排斥情緒，但最終人口越溝越淡。正如上海，兩千萬人口中，一半本地人，一半外地人，會說流利上海話的買少見少。廣州也差不多，雖然大多仍會說廣東話，但亦幾乎全民皆會普通話。是的，作為土生土長的香港人，我們希望保留原有語言、文化、習俗，但時而勢易，這似乎是不可逆轉的大趨勢。

想不到當年的想法，後來一一應驗。

「喂，杜中，諗乜野諗到出晒神？」侍廳阿Ben問。阿Ben是其中一個難得會講廣東話的伙記，幾十年老朋友。

「無呀，懷緬下過去姐。係啦，我都係時候埋單，要去剪頭髮。」

「你知唔知街口阿Barry間舖執左啦？依家全旺角得番阿Ken個間係識講廣東話。」

「全香港越來越多舖頭都係普通話only，講廣東話的舖頭真係買少見少」

「唔好講啦，你知唔知上次我睇到一個招聘廣告，上面寫著“会说粤语优先聘用”。撞鬼，依家識講廣東話變成asset。當年係掉返轉架嘛，識講普通話既話，見工有優勢。」

「我講件仲搞笑既事俾你知：早前我個孫突然走來問我，話爺爺，你可不可以教我說粵語？我心裏暗爽，估唔到個豆丁咁有心學廣東話。後來發現，原來佢係想見人口普查既暑假工，因為上面有一行問識唔識講廣東話，識既話基本會請。」

「想當年，人口普查張form問既問題係你識唔識講潮州話、客家話、福建話呢D方言。估唔到今時今日，係香港地，廣東話竟然變左方言。」

「其實自從2030年後，政府推出全民普通話教育，學生係上堂時候用普通話，就估到有今日。慢慢大家都會習慣平時講普通話，而廣東話呢，就變左我地呢D老野既語言，社會的集體回憶。」

「仲有呀，2030年後咪好似多左幾個普通話電視台，乜鬼香港衛視，CCTV19，連無線都加左個個普通話台。你諗下，學校又普通話，屋企又普通話。」

「唔止添呀，街上面一樣都係普通話。來香港定居既，越來越多人唔學點識廣東話，久而久之，成個講普通話既population 就大到不可逆轉。」

「語言呢家野就係咁得意。個時D𡃁仔返到屋企都寧願用普通話同父母講野，父母當然會就佢地，搞到依家我個孫基本上唔識講廣東話。講多件事你知，我孫仔上次真係唔知好嬲定好笑。」

「咩事？」

「佢個次係學校學左首《燕詩》，返到屋企好興奮，想念俾我地聽。當佢讀到最後幾句『思爾為雛日，高飛背母時，當年父母念，今日爾應知』我真係load 唔到，呢幾句說話我好鍾意，但我從來都只係用廣東話loop 呢幾句，完全無試過用普通話既角度去諗呢首詩，聽完只係覺得用普通話讀詩，感覺真係好突兀。」

「哈哈，係囉，詩詞歌賦用普通話讀，真係唔ok囉。但係隨著我地呢批老野都byebye 之後，估計將來都未必有人識點用廣東話讀燕詩。」

「真係好彩仲有你，我D朋友走既走，移民既移民，無你真係唔知仲邊到用廣東話吹水。好似Ryan咁，佢去左加拿大，依家幾逍遙快活。佢個次先搞笑，佢問我知唔知依家邊度『最香港』？」

「吓，咪香港囉？」

「我都係咁講，佢話no，依家『最香港』既地方係加拿大既Richmond，三藩市的唐人街，同Melbourne既唐人街，香港頂晒籠排第四。」

「有見地...唔講啦，我真係要走啦。今晚仲要參加『我係本土香港人』的event。」

「咩event?」

「你唔知咩？政府剛剛出左一份新既諮詢文件，建議香港逐步廢除繁體字，十年後完成…」

(注：本文乃作者白日夢之作，文中數據純粹猜測，並無事實根據，切忌認真)