毛記集資短評

今朝花左少少時間睇下<毛記葵涌>本厚厚的招股書，同網上一D新聞，發現大家淨係聚焦係入場費2千幾蚊，同埋最近一年頭八個月的利潤跌左。但係無人講個financial arrangement，同埋成件事既本質？？

其實成件事就係腦細掏空晒公司現有賺既錢，然後將自己既名氣同creative assets 賣25% 出街，籌六千萬旗，賺錢齊齊分（腦細分大份），蝕錢你既（腦細無出錢）。

**上市前分晒公司D錢**

一般來說，你投資一間公司，公司都會有d assets，例如廠呀、樓呀、甚至現金。所以你買既，唔止係佢賺錢既前景，而你都買緊佢asset 的一部份（根據你佔既股比）

換句話講，如果公司倒閉清盤，賣左D asset 之後，返清街數後，你都會有得分番。D asset 就好似公司抵押左俾你既保證

但係係毛記呢個case，小股東買緊既係公司既creative assets ，同埋呢D creative assets 以後既賺錢能力。原因腦細佢地三條友係上市前將所有之前賺既錢分左去。

毛記呢三年零八個月一共賺左七千萬，腦細佢地之前已經分左四千幾萬，淨低個二千幾萬，亦準備係上市前分埋佢（擺左係balance sheet 既dividend payable 度）

七千萬earnings - 七千萬dividends = 0

點樣佢地要咁做？好似 game over重頭來過，腦細話間公司我地之前賺既，係我地D辛苦錢，係我地三個founders既，關你鬼事。

依家呢，你出錢，我出力。你攞幾千萬出來（集資六千幾萬），佔25%，我呢就出橋出客出名氣，佔75%。之後賺到錢齊齊分，蝕錢呢，就蝕你既。

**集資後執笠，你一蚊只分得番25 cent**

亦因為公司派晒d earnings，無乜assets。如果毛記集資後，第二日執笠。成件事會變成一個超級無敵大scam: 

股東俾1蚊，清盤後攞番0.25蚊(因為公眾佔25%)。

咁個0.75去左邊？就會係3個老細同一個minority shareholder 分左。

佢地集資集六千幾萬，如果腦細真係決定咁做，佢地就會可以多分四千幾萬。呢件事（如果真係發生），就係同人籌左錢之後拎埋D錢走佬一樣。不同的是，佢地係合法地捲走股東D錢（如果佢地真係要咁做）

我講到成件事真係好似scam 咁，因為其實心裡底我係非常支持佢地。曾經在2015年，毛記電視仲係得六點半左右新聞報道既時候，我就寫過一篇文：<林日曦，我會投資你>，今日終於有機會兌現。

究竟佢地會唔會走數，究竟成件事係咪玩財技，我地之後就知。我淨係知道呢一刻我想真金白銀支持香港既創意工業，支持有人有心為大家帶一D既有商業性但又不失娛樂性的創意。

P.S. 如果你打算抽一手，你知唔知你係毛記排老幾？

毛記發行67,500,000 股，佔擴大股本的25%，亦即係話，如果你有一手，2000 股/67,500,000，你係毛記0.003% 的股東

再layman D講，如果新發行的股份，每人只分一手，咁毛記就會有67,500,000/2000 ＝3375股東。亦即係你會係三千幾個小股東之一（不過實際上唔會發生，因為只有一成係公開發售）