王維基其實係一個毒撚

今日Wiki係港大MBA做左個直播。我同另一位HKTV bro聽住Wiki蹩腳的港式英語，見佢講到甩甩核核，仲不時要彈幾句廣東話，Bro有感而發咁講出「毒撚」一詞。

Wiki今年60歲，一生人未停止過打拼。由搞補習社賣教科書，到IDD寬頻，再到電視和網上購物，見到問題佢仍然會兩眼發光： “The more problems, happier”。佢話自己今日緊張，整個表現的確略見佢serious的一面。整體上，佢既表達和舉手投足，都好自我。作為中大山城的EE畢業生，毒撚當之無愧。

不過，我鍾意呢個毒撚個原因，唔止因為佢既商業上既成功，更重要可能係佢carry既精神。
Wiki係直播中，以自身經驗，建議同學仔上街 – “Just get on the field and do it”。用中國式的詞語：干就完了！直接上場幹，是最好的磨練。

放眼香江，交易所上香港本土上市企業中，目前有幾多間是係「係街度打出來，而仲想打落去？」

最接近香港電視的，可能就係維化奶。又或者新世界。但係，呢D都係二代甚至三代。白手興家但第一代仲話緊事既？好似真係得香港電視。

曾經有一個VC前輩講過，公司成立的頭幾個月，基本上決定咗一間公司可以做到幾大。呢句說話既精神係，公司的founders係最重要的變量。商業模式可以不斷pivot，但係人就好難。如果唔可以自我迭代，終身學習，不斷成長，咁基本上天花板就係一個人既認知或者想像力。

所以係投資世界裏面，睇公司商業模式固然重要，但係睇人可能更重要。而對於人既判斷，比對於事情的判斷，更不統一，更「非標」。對於事情的判斷尚且有各種商業世界已經成形的分析概念和工具幫手，對於人呢？幾乎沒有太多討論。

Apply呢種VC角度去二級市場睇一睇，可能會有驚喜，我諗。

Wiki係香港呢一個年代絕無僅有的fighter。個種拼搏至死的精神、不甘心不服輸、頑強的生命力，直情隔住螢幕都feel到。

毒撚的好處是心無旁騖，好pure好真。仲記得第一次睇香港電視的年報時，驚訝既係盤數好乾淨簡單，沒有玩上市世界的各種tricks。Wiki作為中大Double E出身，身上（和英文）都帶著濃厚的engineer氣息。

毒撚仲有個好處係focused。佢今日直播講到，一路都無買樓，人地叫佢買，佢都唔買。佢無講，但我講得係佢心底裏面，認為錢應該要使係可以創造長期價值的事情上。呢樣野係都係我佩服佢既地方。由當年香港寬頻自己挖路鋪線，到香港電視初期花幾億買左套German system去automate分揀配送，係呢個急功近利的大環境下，能夠堅持長期主義，我認為十分難得。

某個程度上，呢個毒撚唔止做緊e-commerce的生意。講得誇張D，佢真係為呢個沉淪中的城市一絲希望。由老套的獅子山下拼搏精神，到香港人的靈活走位、識執生，到香港城市的科技發展（well 香港電視套tech放在中國/美國standard就真係好一般，但對香港呢二十年來說，有一定象徵意義），佢既成功，讓希望有個落腳點，變成事實。我唔知可以為香港帶來多少正反饋，但至少one example is better than none。

所以都要感謝呢個毒撚，身體力行，承載著香港曾經重要而目前快速沒落的精神。